Алексеева Евдокия Саввична
Евдокия Саввична 1907 сыллаахха Дьаархан нэһилиэгэр төрөөбүтэ. Ийэтэ кыра эрдэҕинэ өлбүтэ. Кини үлэ ыараханын билбитэ, иккиэн аҕатынаан бииргэ сылдьан үлэлииллэрэ. Улаатан баран баҕа өттүнэн ыанньыксыттаабыта. Евдокия Саввична сэрии сылларыгар ыанньыксыттаабытын иһин уонна үчүгэй үлэтин иһин биир мэдээллээх, элбэх грамоталардаах. Элбэх үүтү ыатаҕына бириэмийэлэрэ кыра эт, арыы биэрэллэрэ. Кини үйэтин тухары ыанььыксыттаабыта, ардыгар сайын аҕыйах хонукка от охсон сүөһүлэрин аһатар, уопсайа 95 сүөһүнү көрбүт. Евдокия Саввична кыыс оҕолоох, ол оҕотун үлэлии барарыгар илдьэ сылдьара. Билигин кыыһа Февронья Элгээйигэ атыыһыттыыр. Евдокия Саввична 1969 сыллаахха уурайбыт.
Кини кэргэнэ Потапов Афанасий Афанасьевич (Дьулуур Охоноос) сэрии бэтэрээнэ. Кинилэр элбэх бырааттыылар этилэр. Үс убайа сэрииттэн эргиллибэтэхтэрэ. Кини олус көнө, судургу, үтүө майгылаах киһи этэ. Элбэх сэһэннээҕэ. Кини араас үлэлэргэ үлэлээбитэ. Кэлин сааһыран баран Баҕана Күөлүгэр тахсан оттуура, ону олус сөбүлүүрэ. Саввична бииргэ төрөөбүт убайдаах, убайа 6 оҕолоох, элбэх сиэннэрдээх. Ол курдук Евдокия сэрии сылларыгар хайдах үлэлээбитин ол үлэтэ ыараханын кэпсиир. Кини билигин бочуоттаах сынньалаҥҥа олорор, сиэннэрин көрөр-харайар.
Ахтыыны суруйда Алексеева Мария
Захарова Мария Семеновна
Захарова Мария семеновна 1917 сыллаахха Ленскэй оройуонугар Бохтуйаҕа төрөөбүтэ. Дьоно 12 саастааҕар хамса табаах, кутуу чэй иһин 40 сүөһүлээх ыалга саах күрдьээччинэн биэрбиттэрэ. Онно сылдьан аан маҥнай комсомолка буолбута. Ол кэнниттэн холкуоска киирбитэ. Кини комсомолецтары кытта агитационнай үлэҕэ активнайдык кыттыбыта. Оннук сылдьан 1933 сыллаахха Бүлүүчээҥҥэ тахсыбыта. 2 сыл устата Бохтуйаттан Бүлүүчээҥҥэ бурдук тиэйэн бэдэрээччитинэн үлэлээбитэ. Тиэйбит бурдугуттан килиэп оҥорон дьоҥҥо атыылыыра. Мария Семеновна Бүлүүчээн сельпотугар 9 сыл биэкэринэн үлэлээн баран Кириэстээххэ тахсан салҕыы үлэлээбитэ.
Аҕа дойду Улуу сэриитин кэмигэр 1941-1942 сылларга Илимнииргэ биэкэринэн үлэлээбитэ. Үлэлиирин тухары хайҕалга сылдьыбыта, хас да төгүл грамотанан наҕараадаламмыта. Онтон 1943 сыллаахха Сунтаар сельпотугар атыыһытынан үлэлии киирбитэю. 3 сыл буолан баран Уһун Күөлгэ Тыһакыыс ферматыгар оҕуруотчуттар биригэдьиирдэринэн үлэлээбитэ. Кини үүннэрбит оҕуруотун аһа Сунтаарга быыстапкаҕа көрдөрүллүбүтэ. Иннэ 2 сыл үлэлээн баран Чуукаарга көһөн кэлбитэ. 1952 сыллаахха Буденай холкуос балыыһатыгар үлэһитинэн киирбитэ. 1956 сыллаахха төннөн кэлбитэ уонна балыыһаҕа повардаабыта, ол кэнниттэн оскуолаҕа остуорастаабыта, повардаабыта, онтон интернакка нянянан үлэлээбитэ. Пенсияҕа тахсан баран сопхуоска киирэн 2 сыл водокачкаҕа үлэлээбитэ.
Иванова Александра Софроновна
Иванова Александра Софроновна 1913 сыллаахха төрөөбүтэ. Кыратыгар аҕата өлөн соҕотох ийэлэрин эрэ көрүүтүгэр 4 буолан хаалбыттара. Бырааттара кыра сыллдьан ыалдьан өлбүтэ. Эдьийэ Анна Софроновна партиялаах эҥин этэ, онон ыраах Өймөкөөн оройуонугар хоту партия линиятынан үлэлии сылдьыбыт, онтон доруобуйатынан мөлтөөн дойтутугар Куоһааҥҥа төннөн кэлбитэ уонна онно өлбүтэ. Александра Софроновна холкуос араас үлэлэригэр харса суох үлэлиирэ этэ. Кыһынын саһааннаан, сайынын окко үлэлээн, саас ыһыыга сылдьара. Билигин бииргэ төрөөбүттэр иккиэлэр, быраата Иннокентий Софронович уонна Александра Софроновна. Александра Софроновна бэйэтин дьолун булан Тимофеев Капитон Никифоровичтыын холбоспута. Кинилэр биир иитийэх кыыстаахтар. Онтулара кэргэннэнэн түөрт оҕо күн күбэй ийэтэ. Билигин Бүлүүчээн нэһилиэгэр олороллор.
Хаартыскаҕа Александра Софроновна саамай таптыыр сиэнин Сашаны кытта олорор.
Иванова Анна Саввична
Иванова Анна Саввична ып-ыраас хааннаах, үрдүк уҥуохтаах, олус кыраһыабай этэ. Мааны таҥастаах буолара. Кындыа кыргыттара Анна, Екатерина, Евдокия үҥкүүлүү сылдьалларын ымсыыра көрөрбүт диэн кэпсииллэрэ.
Аннаны олох эдэр сааһыгар Уһун Күөлгэ Чааккы уола Ыстапааҥҥа кэргэн биэрбиттэрэ. Өр олорботохторо, таптаабат киһитэ буолан сыарҕа суола турбутун кэнниттэн арахсан кэлэн хаалбыта. «Эриттэн арахсыбыт дьахтары хайа ыал уола ылыай?» диэннэр бэйэтинээҕэр төһө эмит аҕа саастаах, элбэх оҕолоох огдообо киһиэхэ, Бэрбээ эмээхсин күтүөтэ Иванов Василий Алексеевичка (Уус Баһылайга) кэргэн биэрбиттэрэ. Кэргэнэ эрдэ өлөн эдэригэр огдообо хаалбыта. Кини наһаа күүстээх санаалаах, эр киһи курдук кыайыылаах-хотуулаах этэ. Оту бэйэтэ охсоро, кыһын оту-маһы бэйэтэ тиэйэрэ. Кини кими даҕаны мөҕүттэ, үөҕэ, сиилии-хобулуу сылдьыбат идэлээҕэ. Тугу сөбүлээбэтэҕин, итэҕэһи быһаччы, малтаччы бэйэлэригэр этэрэ. Ол иһин Анна Саввичнаны “хаҕыс оҕус” диэн ааттыыллара.
30-тан тахсыбыт, иитиэхтэрэ-харайыахтара диэбит кыргыттара Марфалаах Фекла эрдэ олохтон туораабыттара, 5 саастаах кырачаан уолун сүтэрии барыта ийэ сүрэҕин аҥаарын хайа охсон барбыт буолуохтаах. Ону дьоҥҥо да, дьиэ кэргэнигэр да ытаан-соҥоон, муҥатыйан көрдөрбөтөҕө. Арай биирдэ эмит “муҥнаах олох буулаата, эрэйдээх олох эҥэрдэстэ” диэн ыллыыра.
Анна Саввична оҕолорун, кинилэр доруобуйаларын туһугар толорбута. Кыра кыыһа Валентина өрүү ыарыһах этэ, 10-һу бүтэрэн баран ыанньыксыттыыр кыаҕа суоҕа, 60 саастаах эмээхсин кыыһын оннугар ыанньыксыттыы барбыта. Онтон элбэх сыл ыанньыксытынан үлэлээбитэ. Бастыҥ ыанньыксыттар ахсааннарыгар сылдьыбыта. Ленин статуэтката, грамоталара-кини саамай үрдүктүк сыаналыыр наҕараадалара этэ. Ол иһин кинилэри быыл буолуохтара диэн сото, ыраастыы сылдьара. Кини элбэх тулаайах хаалбыт сиэннэрин үлэҕэ бэриниилээх, сүрэхтээх, туругас-толоругас буоларга иитэлээбитэ. Кинилэр эбэлэрин салалтатынан кып-кыра эрдэхтэриттэн ынах ыаһан, сир астаан, дьиэ ис-тас үлэтин толорон, үлэ диэн өйдөбүлү кытаанахтык иҥэринэн улааппыттара. Улахан кыыһа Фекла Васильевна 17 сааһыттан Тойбохой сельпотугар, Ленин аатынан холкуос Дьаарханнааҕы отделениятыгар бухгалтерынан үлэлээбитэ. Иккис кыыһа Марфа ыанньыксытынан үлэлээбитэ уонна эдэр сааһыгар олохтон туораабыта. Уола Семен Васильевич көмүс промышленнаһын бэтэрээнэ. Орто кыыһа Любовь Васильевна орто оскуоланы бүтэрэн баран комсомольскай путевканан Дьаархан отделениятыгар ыанньыксыттаабыта, кэлин фермаҕа биригэдьиирдээбитэ уонна остолобуойга үлэлээбитэ. Соҕотох 5 оҕону иитэн дьон оҥортообута Мария Эдуардовна-Аммаҕа оскуола директора, Екатерина Эдуардовна нуучча тылын учуутала, Егор Тааттаҕа летчик-наблюдателинэн, Жанна Эдуардовна – Сунтаарга хирургическай отделение сэбиэдиссэйэ. Кыра кыыс Наташа-энергосбыт контролера. Валентина Васильевна-библиотекарь, ССРС култууратын туйгуна. Кыра кыыс Изабелла Васильевна Тойбохойго атыы-эргиэн эйгэтигэр 40-тан тахса сыл үлэлээбитэ. Кинини “Атыыһыт Иза” диэн аатынан билэллэрэ.
Ити курдук кырдьаҕас ийэ, Анна Саввична олоххо баҕата туолла.
Ахтыыны суруйда кыыһа Иванова А.А.
Тыыл бэтэрээннэрэ
«Маар Күөл» ферма туруу дьоно
Кондратьева Татьяна Николаевна
Кондратьева Татьяна Николаевна 1909 сыллаахха төрөөбүтэ. Кини эдэр сааһыгар холкуоска үлэлээбитэ. Кини 5 оҕолооҕуттан 4 оҕото билигин баар. Улахан кыыһа Таня эдэр сааһыгар 1976 сылга өлбүтэ. Иккис кыыһа Анна билигин пенсияҕа тахсыбыта. Кини 8 оҕолоох уонна 3 сиэннээх. Улахан кыыһа Таня 3 оҕолоох. Юрий манна үлэлии сылдьар. Үс уола сулууспалыы сылдьаллар. Икки оҕото Дьаархаҥҥа аҕыс кылаастаах оскуолатыгар үөрэнэллэр. Үһүс уола Владимир маҕаҥыыҥҥа үлэлээбитэ. Кини 6 оҕолоох. Икки кыыһа үөрэххэ сылдьаллар.
Татьяна Николаевна урут Куоһааҥҥа олорбута. Түөрт оҕону аһылыктарын астаан, үөрэттэрэн таһаарбыта. Билигин Татьяна Николаевнаны оҕолоро уонна сиэннэрэ көрөллөр.
Ахтыыны суруйда Кондратьева Элеонора
Николаева Анна Николаевна
Николаева Анна Николаевна 1931 сыллаахха Дьаархан нэһилиэгин Чуукаар диэн сиргэ саха бааһынай ыалыгар үһүс оҕоннон төрөөбүт. Оҕо эрдэҕиттэн ыарахан үлэҕэ сылдьыбыта. Мас бэлэмнииллэрэ, от оттууллара, бурдук ыһаллара. Сэрии кэмигэр уон саастаах оҕо этэ. Туох баар ыарахан үлэҕэ улахан дьону кытары үлэлэһэрэ. 1947 сылтан 1967 сылга диэри Тойбохой холкуоска ыанньыксыттаан үлэлээбитэ. Онтон 1967 сыл кулун тутар 1 күнүттэн 1980 сылга диэри Тойбохой сопхуоһун Дьаархан нэһилиэгин отделениятыгар ыанньыксытынан үлэлээбитэ. 1980 сылтан доруобуйата мөлтөөбүтүнэн сибээстээн уурайбыта.
1963 сыл олунньу 28 күнүгэр 2 ст. “Медаль материнства” мэдээлинэн наҕараадаламмыта. 1968 сылга 1 ст. «Медаль материнства» анаммыта. 1970 сылга 3 ст. «Материнская Слава» орденынан наҕараадаламмыта. 1973 сылга 2 ст. «Материнская Слава» наҕараадалаах. 1995 сыллаахха Кыайыы 50 сылыгар “Ветеран тыла” знак анаммыта. Аҕа дойду сэриитэ Кыайыытын 50 сылыгар анаммыт юбилейнай мэдээллээх. 1992 сылга “За доблестный труд в Великой Отечественной войне 1941-1945” мэдээлинэн наҕараадаламмыта. 1997 сылга СССР народнай депутаттарын Постояннай президиум съеһин уурааҕын быһаарыытынан “Маршал Советского Союза Жуков” юбилейнай мэдээлинэн наҕараадаламмыта.
Николаева Харитина Алексеевна
Николаева Харитина Алексеевна 1889 сыллаахха Уһун Күөлгэ Хапчыгыр диэн сиргэ (биирдиилээн олорор ыалга) төрөөбүт. Кини аҕата Уйбануоп Өлөксөй диэн киһи. Кини тоҕус оҕолооҕо, ол иһигэр улахан кыыс (Харитина) баара. Улаатан баран 30 саастааҕар Ньукулаайап Уйбаан диэн киһиэхэ кэргэн тахсыбыт. Кинилэр бастаан Ыылаах диэн сиргэ олорбуттар. Ол олорон 18 оҕону төрөппүттэр, ол гынан баран балыыһа, эмп суох бириэмэлэригэр сорох оҕолоро өлбүттэр. Аҕа дойду Улуу сэриитин сылларыгар икки ыал буолбут кыргыттара өлбүттэр. Олортон улахан кыыһыттан икки оҕо уоллаах кыыс. Иккис кыыһыттан түөрт оҕо икки уол, икки кыыс хаалбыттар. Ону ас-таҥас суох эрдэҕинэ 9 оҕону иитэн таһаарбыт. Оччолорго көмөлөһөр улахан оҕото суоҕа. Оҕонньоро икки хараҕа суох буолбут. Кини оччолорго Чуукаар холкуоска үлэлиирэ. Дьиэни истэри-тастары көрөрө, бэйэтэ өйүнэн-санаатынан, кыанарынан улахан эрэйинэн иитэлээбитэ. Холкуоска сайын сиэрпэннэн 28 суотай бурдугу баһара, оту гаанынан эрэ кыайбыта. Ол иһин үлэ мэдээлинэн наҕараадаламмыта. Чуукаар холкуоска үлэлии сылдьан “Үлэ ударнига” буолбут. Кэлин 1967 сыллаахха бочуотунай грамотаны өр сылларга бастаан холкуоска онтон сопхуоска үлэлээбитин иһин ылбыт. Ити сылга Октябрьскай революция буолбута 50 сыла туолбут.
Харитина Алексеевна уола Данил Иванович
Кэлин кырдьан баран дьиэ үлэтигэр истэри-тастары көмөлөһөрө. Сиэннэрин харайсан, сорохторун улаатыннаран көмө киһитэ гынаттаабыта. 1974 сыллаахха кини тохсус сиэнэ төрөөбүтэ. Кини сиэннэрэ билигин Дьаархаҥҥа, Мирнэйгэ, Тойбохойго уо. д. а. сирдэргэ бааллар. Николаева Харитина Алексеевна 1979 сыллаахха алтынньы 19 күнүгэр олохтон туораабыта.
Харитина Алексеевна уолун Данил Иванович оҕолорун кытта түспүт хаартыската
Ахтыыны суруйда 8 кылаас үөрэнээччитэ Филиппова Роза
Петрова Февронья Алексеевна
Петрова Февронья Алексеевна төрөөбүт сыла биллибэт. Кини Дьаархан нэһилиэгэр төрөөбүтэ. Кини эмиэ атын оччотооҕу дьон курдук кыра сааһыттан үлэлээбит. Оччотооҕу ыарахан олоххо олордохторуна ыраахтааҕы былааһа сууллубут туһунан сурах кэлбитэ.Оччолорго уончалаах кыыс этэ. Советскай былаас олохтоммутун кэннэ кини холкуос үлэлэригэр актыыбынайдык кыттыбыта.Отутус сыллардаахха Стахановскай хамсааһыҥҥа кыттыбыта. Дьүөгэлэриниин Федотова Мария Саввична, Трифонова Матрена Саввична буолан сарсыардаттан киэһээҥҥэ диэри үлэлииллэрэ. Сэрии ыар кэмнэригэр Февронья Алексеевна фроҥҥа барбыт эр дьоннор оннуларыгар хаалан эмиэ элбэхтик үлэлээбитэ. Сайын от охсоллоро, мунньаллара, күһүн бурдук хомуйаллара.
Потапова Ксенья Саввична
Дьаархан бөһүөлэгэр ытыктанар кырдьаҕас эмээхсин Потапова Ксенья Саввична олорор. Биһиги кини дьиэтигэр киирэн бэйэтин олоҕун туһунан кэпсииригэр көрдөспүппүт. Түннүк аттыгар турар устуулга олорон бэйэтин кыһалҕалаах олоҕун кэпсиир: “Төрөөбүт сирим Чуукаар, хас сыллаахха төрөөбүппүн билбэппин. Дьиэбитигэр 4 буолан олорбуппут. Ийэм Өкүлүүн, эбээм Сөдүөччүйэ, эһээм Өлөксөй, аҕабын өйдөөбөппүн. Ыал соҕотох оҕото этим. Сэрии сылларыгар Ньукулаайап Кууһума баһаатайдаах окко үлэлээбиппит, от охсорбут, чөмөктүүрбүт, чөҥөчөк түөрэрбит. Сатыы Өлөксөй Маарыгар баран үлэлиирбит. Оскуолаҕа саһаан туруорарбыт, быа хатарбыт.Оскуолаҕа үөрэммэтэҕим”. Кэлин кэргэннэммит, барыта 13-тэ төрөөбүт, сорох оҕолоро ыалдьан өлбүттэр. Билигин түөрт оҕото баар Афанасий, Николай, Виктор, Иван. Оҕолоро араас үлэҕэ үлэлииллэр. Афанасий-Дьаархан нэһилиэгин бэрэссэдээтэлэ, Виктор оскуолаҕа история уруогун үөрэтэр. Билигин Ксенья Саввична дьоллоох ийэ, эбээ, хос эбээ. Сынньалаҥҥа олорор (сааһа ырааппыт билбэт), сиэннэрин көрөр. Ксенья Саввична саҥа сопхуос тэриллэригэр көмөлөспүтэ. Сопхуос ынаҕа аҕыйаҕын иһин, сайын аайы 5-тии, 6-лыы ынаҕы биэрбит. Сэппэрээдэр биэрбит, ону өр туттубуттар. Онон Ксенья Саввична сопхуос тэрийсиитигэр улахан өҥөлөөх.Биһиги нэһилиэкпитигэр ытыктанар кырдьаҕастар элбэхтэр, сорохторо төһө да кырыйдаллар сүүрэ-көтө, көмөлөһө сылдьаллар. Билигин санаан көрдөххө сэрии сылларыгар нэһилиэкпит үлэһиттэрэ хорсуннук үлэлээбиттэр, кыайыы туһугар тыылга геройдуу быһыыны оҥорбуттар эбит. Кинилэр баар ыарахаттары тулуйбут эрэ буолбаккалар, инники сайдар кэскилин оҥкулларын оҥорбуттар.
Ахтыыны суруйда Саввинова Ираида
Спиридонов Кирилл Гаврильевич
Спиридонов Кирилл Гаврильевич дьадаҥы дьиэ кэргэҥҥэ Сунтаар оройуонун территориятыгар Куокуну аттыгар 1913 сыллаахха сэтинньи 3 күнүгэр төрөөбүтэ. Кириэстээх таҥаратын дьиэтигэр Расторгуев аҕабыыкка киллэрэн Спиридонов Кирилл Гаврильевич диэн ааты биэрбиттэр. Кириэстээх Куокуну икки ардыгар алта ыал буолан олорбуттар. Ити сыллартан сорохторо өлөн, сорохторо баран хааланнар кинилэр эрэ хаалбыттар. Ийэлэрэ хараҕа суох буолан оскуолаҕа киирбэккэ сылдьыбыт. Онтон кэлин 19 саастааҕар 1931 сыллаахха Кириэстээххэ 1 кылааска үөрэнэ киирбит. Оччоҕо ас-таҥас суоҕа онон кинилэр 5 километр сиргэ дьиэлэриттэн хааман үөрэнэллэрэ. Онно кинилэри Дьаархан олохтооҕо Васильев Иван Иванович, Кириэстээх олохтооҕо Саввинов Яков Яковлевич үөрэппиттэрэ.Кирилл Гаврильевич 4 кылааһы 1935 сыллаахха саас бүтэрбитэ. 4 кылааһы бүтэрэригэр 23 саастааҕа. Онтон Тойбохойго 7 кылаастаах оскуолаҕа үөрэттэрэ ыыппыттара. Онно үөрэнэ сылдьан Кирилл эмиэ үлэлиирэ. Түүн склад харабыллыыра онтон күнүс от таһара. Саас буолбутун кэннэ сири хорутууга үлэлиирэ. Онно ордук Макар Гаврильевич уонна Иванов Василий Николаевич үлэлииллэрэ. Ардыгар кини бурдук астааһыныгар үлэлиирэ. 1943 сыллаахха Аҕа дойду сэриитин бириэмэтигэр бэрэссэдээтэл ыҥыран ылан Кэмпэндээйигэ туус бэдэрээтигэр бараҕын диэбит онно Кирилл Гаврильевич хорсуннук барабын диэбит. Кини туох да үлэттэн куттаммата. Онно барарыгар кини чап-чараас индьирийбит сонунан барбыта. Кэмпэндээйигэ тиийэн үлэлээбитинэн барбыта. Онно хаара дириҥ этэ, халлаана эмиэ тыбыс-тымныы буолара. Ону ол диэбэккэ үлэлиирэ. Кирилл Гаврильевич ийэлээх, аҕатын бэйэтэ үлэлээн аһаталыыра. 1942 сыллаахха ыам ыйыгар холкуоска суоччутунан анаабыттара. 4 хонон баран Сунтаарга ыҥырбыттар онно кинини Дьаархан нэһилиэгэр Чуукаар диэн холкуоска суоччутунан анаабыттар. Ити 1945 сыллаахха от ыйа этэ. 1949 сыллаахха улахан кураан күннэр буолбуттар онно баһаар буолбут. Онно Кирилл Гаврильевич эмиэ баран ол уоту умуруорсубута. Ол сыл дуоннаах от үүммэтэх. Кинилэр оччоҕо 840 ынах сүөһүлээх, 200-чэ сылгылаах этилэр. Биирдии дьоннордуун 62 хаһаайыстыбалаах 90 гектар ыһыылаах, 2 мунньар массыыналаах этилэр. 1950 сыл үүнэригэр “Чуукаар”, “2 Пятилетка” уонна “Буденнай” холкуостар холбоспуттар. 1979 сыллаахха Кирилл Гаврильевич Кэмпэндээйи куруортугар эмтэнэ барбыта. Онтон кини 1979 сыллаахха кэлбитэ. 14 сыл суоччутунан үлэлээбитэ, 24 сыл электромонтерунан уонна 2 сыл бэрэссэдээтэлинэн үлэлээбит. Үчүгэй үлэтин иһин 3 мэдээлинэн наҕараадаламмыт уонна элбэх грамоталардаах. 1970 сыллаахха коммунист аатын ылбыта. Кини 4 оҕолоох.
Тимофеев Капитон Никифорович
Биһиги бөһүөлэкпитигэр биир ытыктанар кырдьаҕаһынан буолар. Холкуоһунай, сопхуоһунай тутуу бэтэрээнэ. Капитон Никифорович 1916 сыллаахха төрөөбүтэ. Кини 1935 сылтан 1940 сылга дылы “Эйикээр” холкуоска биригэдьииринэн үлэлээбитэ. Онтон сэрии сылларын бириэмэтигэр 1940 сылтан үлэ фронугар сылдьыбыта. Онно сылдьан кэлэн баран “Сталин” аатынан холкуоска кладовщигынан үлэлээбитэ. Кладовщигынан үлэлээн баран кэлин Тойбохой сельпотугар атыыһытынан үлэлээбитэ. Ол кэнниттэн араас үлэлэргэ рабочайынан сылдьыбыт.
Капитон Никифорович 1972 сыллаахха Саха сирэ 50 сыла туолуутугар аналлаах грамотанан наҕараадаламмыта. Ол грамота САССР Верховнай Советыттан, САССР обкомуттан, САССР Министирдэрин Советыттан кэлбит. Кини ол сайын “Тойбохой” сопхуос Дьаархан отделениятын механизированнай звенотугар чилиэн быһыытынан окко үлэлэспитэ. Онно кинилэр звенолара оттооһуҥҥа Тойбохой сопхуоска маҥнайгы миэстэни ылбыта. Ол иһин бу звено кырдьаҕас оттооччутун, звено кырдьаҕас чилиэнин грамотанан наҕараадалаабыттара. Капитон Никифорович биир кыыстаах. Ол кыыһа Лидия Капитоновна билигин “Бүлүүчээн” сопхуоска олорор. Капитон Никифорович 4 сиэннээх. Бу кини саамай таптыыр сиэнин Сашаны кытта олорор. Дьаархан бөһүөлэгэр Капитон Никифоровиһы билбэт киһи диэн суох. Кини аата хаһан да умнуллуо суоҕа диэн эрэнэбит!
Ахтыыны суруйда Федорова Наташа